150 жылдыққа — 150 концерт
Ақтөбе қаласының көркіне айналған Өнер орталығы да жыл бойы көрермендерге толатын болады. Шырайлы шаһардың 150 жылдық мерекесімен үндескен Жастар жылында бұл өнер ордасында көптеген рухани-мәдени шаралар өтпек.
Сондай айтулы шаралардың бірі — Ғ.Жұбанова атындағы облыстық филармония қаңтардың 22-26 күндері Өнер орталығында қала тұрғындары мен қонақтарына тегін мерекелік «Сүйікті кинофильм әуендері» атты концертін ұсынып жатыр.
Бұл — қаламыздың даталы мерекесіне орай қолға алынған «150 концерт» бастамасы аясындағы алғашқы қадамдардың бірі. Мерекелік акция зиялы қауым өкілдері мен білім беру қызметкерлерінің қатысуымен өткізілуде. Күн сайын кешкі 18.30-да болатын концертте А.Жұбанов атындағы қазақ ұлт аспаптар оркестрі көркемдік жетекшісі, ҚР еңбек сіңірген қайраткері Дәурен Ғылымов пен бас дирижері, ҚР мәдениет үздігі Мәдина Қабижанованың жетекшілік етуімен сүйікті киноәуендерді орындайды.