Үш күн ыстық су болмайды
Құлаққағыс
«Aqtobe su–energy group» АҚ-ның хабарлауынша, 5-7 қыркүйек күндері Ақтөбе қаласында ыстық су беру тоқтатылады.
Жылу мен ауызсумен жабдықтау, сондай-ақ кәріз су бұру қызметтерін көрсететін монополист мекеменің өкілдері мұның жылдағы жоспарлы жұмыс екенін, сол арқылы алдағы жылыту маусымына дайындық жүргізілетінін алға тартады.
Ақтөбе қаласы және Есет батыр (Нұр Ақтөбе) шағын ауданы бойынша жоғарыда аталған кәсіпорын «ЖЭО» АҚ-пен бірлесіп магистралды және ішкі кварталды жылу желілеріне гидравликалық сынақ жұмыстарын өткізеді.
— Жылу жүйесі жылына екі рет тексерістен өтеді — жылыту мерзімі аяқталатын көктемде және жаңа жылыту мерзімінің басталар тұсында. Бұл жұмыстар алда жылытуды кедергісіз жүзеге асыру үшін жасалады.
Тұтыну кооперативтері, кондоминиумдер мен өзге де тұтынушылар сынақ жұмыстары барысында үйлер мен ғимараттардың жылу жүйелеріндегі ілмекті арматураны нық жабу қажет, — деп хабарлайды кәсіпорын өкілдері.
Тұрғындарға ыстық су 8 қыркүйек күні беріледі деп жоспарланып отыр. «Aqtobe su-energy group» АҚ келтірілген қолайсыздықтар үшін алдын ала кешірім сұрайды.
Айбек СЕРІКҰЛЫ.