Ақтөбе облысында су тасқынынан зардап шеккен 250 бала сауықтыру лагерлеріне демалуға жіберілді
Президент Қасым-Жомарт Тоқаев өз үндеуінде су тасқынынан зардап шеккен қазақстандықтардың бірде-бірі мемлекет назарынан тыс қалмайтынына сендірді. Барлық мұқтаж жандарға тек қаржылай ғана емес, сонымен қатар барлық қажетті қолдау көрсетіледі.
Мемлекет басшысының тапсырмасына сәйкес, Ақтөбе облысында су тасқынынан зардап шеккен балалардың алғашқы легі республикалық сауықтыру лагерьлеріне демалуға жіберілді.
Осы көктемгі су тасқыны бүкіл ел үшін үлкен сынақ болды. Дегенмен, қазақстандықтар әдеттегідей қиын кезеңдерде бірлігін, ынтымақтастығын көрсетіп, бір-бірлеріне қол ұшын созып, көмектерін аямауда.
Еліміздің түкпір-түкпірінен гуманитарлық көмектер жеткізілуде. Сондай-ақ, Алматы, Ақмола, Түркістан, Жамбыл, Қарағанды өңірлерінде орналасқан сауықтыру орталықтары Ақтөбе облысынан 250 баланы қабылдауға ниет білдірді.
Қазіргі уақытта 200 бала аталған аймақтардағы ең жақсы деген лагерьлерде демалып жатыр. Олардың ішінде су тасқынынан ең көп зардап шеккен Ақтөбе облысы Ойыл, Қобда, Әйтеке би, Темір аудандарының және Ақтөбе қаласының оқушылары бар.
Ойыл ауданынан тағы 30 бала бүгін Алматы облысындағы «Балдәурен-Қонаев» республикалық оқу-сауықтыру орталығына орналастырылады, ал ертең 20 жас ақтөбелік Қарағанды облысының «Балдәурен-Балқаш» оқу-сауықтыру орталығына келеді.
Сауықтыру орталықтарында балаларға барлық жағдай жасалған, оқиды, толыққанды демалып, спортпен шұғылданады және шығармашылық қабілеттерін дамытады.
А.МӘЛІКҚЫЗЫ.
