Соңғы аптада науқастар саны азайды

Тікелей эфир

Облыста соңғы тәулікте коронавирус инфекциясын жұқтырған 62 жағдай тіркелді. Бұл туралы «Вакцинация мен КВИ бойынша ағымдағы жағдай туралы» тікелей эфир барысында облыстық санитарлық-эпидемиологиялық бақылау департаменті басшысының орынбасары Мұхтар Сербаев  пен облыстық денсаулық сақтау басқармасы басшысының орынбасары Бекболат Ізбасаров баяндады.

Мұхтар Сербаевтың айтуынша, 62 жағдайдың ішінде 55-інде ауру симптомдары болса, қалғаны — симптомсыз.

​​​​ — Жалпы облыста коронавируспен ауырған 32414 жағдай тіркелді, оның ішінде 75,7 пайызы ауру белгілерімен және 24,2 пайызы — симптомсыз жағдай. 29871 науқас жазылып шықты. Жалпы, тіркелген 32414 науқастың 0,7 пайызы — ауруды сырттан әкелгендер, 12,1 пайызы — ауру адаммен қарым-қатынаста болғандар, 87 пайызы — жергілікті жағдайлар. ​​Қазіргі таңда үй карантиніне 10625 адам алынып, оларға медициналық бақылау жүргізілуде, — деді ол.

Бүгінгі күні облыста 4011 кәсіпкер «Ashyq» жобасына қатысуға өтініш берген. Оның ішінде «көшбасшы» мәртебесі бар қатысушылар саны – 60. Бағдарлама енгізілгеннен бастап өңірде «Ashyq» жобасына қатысқан «сары» статусы бар 238, «қызыл» статусы бар 314 адам анықталған. Нәтижесінде «қызыл» статусы бар 77 адамға «Әкімшілік құқықбұзушылық туралы» ҚР Кодексінің 425-бабы 1-тармағымен әкімшілік шара қолданылып,  3 412 890 теңге көлемінде айыппұл салынған.

Сондай-ақ биылғы жылдың 24 қыркүйегіне дейін ҚР «Әкімшілік құқықбұзушылық туралы» Кодекстің 425-бабы 1-тармағы бойынша бетперде режимін сақтамаған «Автопарк» ЖШС-ның қызметкеріне екі рет 43 755 теңге көлемінде және №1, №7, №12, №15, №17, №19, №20, №24, №26, №43, №51 бағыттағы автобустардың жүргізушілеріне айыппұл салынған. Ал әлеуметтік қашықтықты сақтамағаны үшін №1, №10, №11,№25 автобустардың жүргізушілері айыппұл төлеуге тиіс.

— Мобильді мониторингтік топтардан және жергілікті полиция қызметінен түскен материалдарға сәйкес Қазақстан Республикасының «Әкімшілік құқықбұзушылық туралы» кодексінің 425-бабы 1-тармағы бойынша анықталған бұзушылықтар  үшін азаматтарға 88 542 550 теңге көлемінде 877 айыппұл салынды. Оның ішінде қоғамдық тамақтану орындарына 32 128 790 теңгеге 229 айыппұл салынды, — деді М.Сербаев.

Тікелей эфир барысында облыстық денсаулық сақтау басқармасы басшысының орынбасары Бекболат Ізбасаров қазіргі таңда инфекциялық ауруханаларда 632 адам ем алып жатқанын, соңғы аптада науқастар саны біршама азайғанын атап өтті.

— Бүгінде жансақтау бөлімінде 76 науқас ем алып жатыр. Жансақтау бөліміндегі науқастардың 22-сі жасанды желдету аппаратына, 39-ы өкпені инвазивті емес желдету аппаратына қосылған. Қазір карантиндік стационарларда бақылауда жатқандар жоқ. Дегенмен 227 бала медициналық қызметкерлердің қарауында тұр. Оның ішінде 5 бала стационарда ем алып жатыр.

Жалпы, стационардағы кереуеттердің 43,6 пайызы, жансақтау бөліміндегі кереуеттердің 43,4 пайызы толық. Өңірдегі 12 зертханаға індет басталғалы 916 620 ПТР-тест әкелінді, соңғы тәулікте 7900 зерттеу жүргізілді, — деді ол.

Тікелей эфир соңында эпидемиолог мамандар әлеуметтік желілер арқылы тұрғындардан түскен сауалдарға жауап берді.   

Айта кету керек, қазіргі таңда Ақтөбе облысы «сары» аймақтар қатарында.

Данагүл ҚАЗИХАН.