Ерлікті еске алды
Ақтөбелік полицейлер Ғазиз Байтасовты еске алды. Ғазиз Байтасов еліміздегі ең жоғары дәрежелі ерекшелік белгісі — «Халық Қаһарманы» атағына ие болған Қазақстандағы алғашқы полицей.
Тараз қаласында 2011 жылдың 12 қарашасында деструктивті діни ағымның жақтаушысы жасаған қылмыстардың салдарынан жеті адам қаза тапқан болатын. Оның бесеуі — құқық қорғау органдарының қызметкерлері, сонымен бірге ішкі істер органдарының үш қызметкері жарақат алған-ды.
Жол полициясы басқармасы батальонының командирі капитан Ғазиз Байтасов қылмыскердің өзін-өзі жарып жіберуге дайындалып жатқанын көріп, ойланбастан оны денесімен жауып, ондаған адамның өмірін сақтап қалды.
Сол батырлық күннен бері 9 жыл өтті. Капитан Байтасов — әрбір полиция қызметкері мен қарапайым азаматтар үшін ерлік пен абырой үлгісі.
Саптық алаңда полицейлер батырды бір минут үнсіздікпен еске алды. Бұл туралы облыстық полиция департаменті баспасөз қызметі хабарлады.
М.РАХАТҚЫЗЫ.
