Жаңа оқу жылы басталды
Биылғы 2020-2021 жаңа оқу жылында облыста үш мектеп пайдалануға берілді.
1 қыркүйек – Білім күнінде облыс бойынша 158 481 оқушы жаңа оқу жылын бастады. 1-сыныпқа 17 982 оқушы қабылданды.
Облыстық білім басқармасының мәліметіне сүйенсек, бастауыш сыныптарда 71 029 оқушы болса, оның 63,5%-ы кезекші сыныптарда оқуды бастаған.
Қазіргі таңда облыста 400-ден астам мектеп жұмыс жасауда, оның ішінде 207 мектепте 1-11 сынып оқушылары дәстүрлі форматта білім алады. Қашықтан оқыту форматында 143 мыңнан астам оқушы оқиды. Облыс мектептерінде 335 жас маман жұмысын бастады. Сондай-ақ биыл облыста жыл соңына дейін 9 жаңа мектеп пайдалануға беріледі.
Білім күнінде Ақтөбе қалалық білім бөліміне қарасты 83 мектепте салтанатты жиындар өткізіліп, 1-сыныпқа 9793 оқушы қабылданды. Коронавирус инфекциясының таралуының алдын алу мақсатында «Білімді ұрпақ — жарқын болашақ» ұранымен тәрбие сағаттары онлайн форматта өткізілді.
Барлық мектептерде «Қазақстан Республикасы Конституциясына 25 жыл», «Абай Құнанбайұлының 175 жылдығы», «Әбу Насыр әл-Фарабидің 1150 жылдығы» тақырыптарында сынып сағаттары ұйымдастырылды. Іс-шаралар барысында оқу үрдісінің ерекшеліктері ескеріліп, оқушыларға өз денсаулықтарын күту, сапалы білім алуда жауапкершілікке баса назар аудару қажеттігі ескертілді.
Д.АЙДАР.
