Көлік аударылып, үш адам жарақаттанды
«Ақтөбе-Қостанай» автожолында көлік аударылып, бірнеше адам жарақат алған. Бұл туралы облыстық полиция басқармасы баспасөз қызметінің жетекшісі Ерболат Сарқұлов хабарлады.
— 28 маусым күні сағат 10.30-да Түркістан қаласының тұрғыны, «Тойота-Камри-70» автокөлігінің 67 жастағы жүргізушісі Ақтөбе қаласы жағынан Қостанай қаласына қарай келе жатып, Әйтеке би ауданы Әйке ауылынан 40 шақырым жерде «Қарабұтақ-Қостанай» автожолының 231-шақырымында көлікті басқара алмай, кюветтің сол жағына аударылып кеткен. Апат салдарынан жүргізуші мен екі жолаушы әртүрлі жарақаттармен Әйтеке би ауданының орталық аудандық ауруханасына жатқызылды, — дейді Е.Сарқұлов.
Полиция департаменті автокөлікті басқара отырып, қауіпсіз қозғалыс жылдамдығын таңдап, жол, метеорологиялық жағдайларды ескеру, қарсы қозғалыс жолағына шығуға байланысты қауіпті маневрлерден бас тарту қажеттігін ескертеді.
Мейрамгүл РАХАТҚЫЗЫ.