Денсаулық

Онкоскрининг қызметі тегін көрсетіледі

Қазақ онкология және радиология ғылыми-зерттеу институтының мәліметі бойынша, қазір онкологиялық диспансерде 180 мыңнан астам адам жатыр. Ақтөбе облысы бойынша қатерлі ісік ауруымен  7515 адам диспансерлік есепте тұр.

Ресми мәліметтерге сүйенсек, еліміз бойынша былтыр 36 345 адам қатерлі ісікке шалдыққан. Аты жаман аурудан қайтыс болғандар саны — 14060 адам. Қатерлі ісікті алғашқы сатысында анықтау жақсарғандықтан, дертінен құлан-таза айығып кететіндердің қатары артқан.

2019 жылдан бастап елімізде алғаш рет өкпе рагы, тері меланомасы мен колоректальды қатерлі ісігімен (тоқішек пен тікішек рагы) ауыратындарға жекелеген ем тағайындау үшін молекулярлық-генетикалық зерттеулер жүргізу қолға алынды. Сондай-ақ, қатерлі ісік бар деген күдік туған жағдайда пациенттерге КТ мен МРТ жасалады. Бұрын бұл тексеру саны тым шектеулі болған. Қазір еліміздегі емханаларда сүт безі қатерлі ісігіне 40-70 жас аралығындағы әйелдер, жатыр мойны қатерлі ісігіне 30-70 жастағы әйелдер мен тоқішек қатерлі ісігіне 50-70 жастағы әйелдер мен ерлерге онкологиялық скрининг тегін өткізіледі және тегін емделеді. ҚР «Халықтың денсаулығы мен денсаулық сақтау жүйесі туралы» жаңа заң жобасында «жұмыс берушілерге қарамағындағы қызметкерлердің тегін скринингтен өтуіне жағдай жасау»  деген жаңа міндет жүктелген. Былтырғы мәліметтерге назар аударсақ, жатыр мойны қатерлі ісігіне —  954 322 әйел (30-70 жас), сүт бездері қатерлі ісігіне 859 877 әйел (30-70) шалдыққан. Қазір елімізде ақысыз түрдегі скринингтің үш түрі бар: сүт безі қатерлі ісігі (40 жастан 70 жасқа дейінгі әйелдер үшін), колоректальды қатерлі ісік (50 жастан 70 жасқа дейінгі ерлер мен әйелдер үшін), жатыр мойны обыры (30 жастан 70 жасқа дейін). Тұрғындар тұрғылықты мекенжайы немесе орналасқан жері бойынша клиникада скринингтен тегін өтеді.

Әлеуметтік медициналық сақтандыру қоры азаматтарды міндетті медициналық сақтандыру аясында жылына бір рет әр сақтанушыға тегін тексеруден және кәсіби тексеруден өтуге шақырады. Кез келген адам ұзақ өмір сүргісі келсе, жүйелі түрде тексеруден өтіп тұруы керек. Құны тым қымбат тұратын тексерулер, скринингтерді Үкімет халыққа тегін жасап жатыр. Сондықтан осы мүмкіндікті жіберіп алмаңыздар.

Кәмшат ҚОПАЕВА.

Басқа жаңалықтар

Back to top button