Италиямен тауар айналымы арта түседі
Облыс әкімі Оңдасын Оразалин Италияның Қазақстан Республикасындағы Төтенше және өкілетті елшісі Паскуале Д’Авиномен кездесті.
Екіжақты кездесу барысында саяси және экономикалық, мәдени гуманитарлық қарым-қатынас жайы сөз болды. Ақтөбе өңірінің көптеген шетелдік компаниялармен тығыз қарым-қатынаста екенін айтқан облыс басшысы Италия елінің де ерекше маңызға ие екенін жеткізді.
— Ақтөбе облысының аумағында шетелдік капиталдың қатысуымен 900-ге жуық компания тіркелген, оның ішінде 5 итальяндық капиталдың қатысуымен жұмыс істейді. Биылғы жылдың 10 айының қорытындысы бойынша Ақтөбе облысы мен Италия арасындағы тауар айналымы 129,8 миллион АҚШ долларын құрады, — деп атап өтті облыс басшысы.
Өз кезегінде Паскуале Д’Авино жылы қабылдауы үшін облыс әкіміне ризашылығын білдіріп, алдағы уақытта да Италия елі түрлі салада тығыз қарым-қатынас орнатуға әзір екендігін айтып өтті.
Облыс басшысы екіжақты өзара байланыс бұдан да жоғары дамитындығына сенім білдірді.
Облыс әкімінің баспасөз қызметі.