Ақтөбелік тәртіп сақшыларының жеңісі
Кубок
Ақтөбелік тәртіп сақшылары қоян-қолтық күрестен Қазақстан Республикасы Тұңғыш Президенті кубогының жеңімпазы атанды. Қоян-қолтық және әскери қоян-қолтық ұрыстан Қазақстан Республикасының Тұңғыш Президенті-Елбасы кубогы үшін V халықаралық турнир 27-30 қараша аралығында Нұр-Сұлтан қаласында өткен болатын.
Ақтөбе облысы ПД баспасөз қызметінің хабарлауынша, бұл додада Қазақстан спортшыларымен қатар Беларусь, Қырғызстан Моңғолия, Өзбекстан елдерінен келген 500-ге тарта балуан бақ сынасқан. Олардың арасында әлем, Азия және Еуропа чемпиондары, 20-дан астам халықаралық дәрежедегі спорт шебері, 70-тен астам спорт шебері, жүздеген кандидат бар.
Қоян-қолтық ұрыс бойынша ерлер арасындағы жеке біріншілікте ақтөбелік тәртіп сақшысы Айдын Төлепбаев үздік деп танылса, жылдам қимылдайтын арнайы жасақ инспекторы Александр Борисов қола медаль иеленді.
— Біздің жеңісіміздің сыры — спортпен табанды түрде айналысу, үздіксіз жаттығу. Өз жеңістеріміз үшін жаттықтырушыларымыз Айбек Шоқпытов пен Ақәділ Убаевқа, жылдам қимылдайтын арнайы жасақ командирі Қажымұқан Шалтақовқа ризашылығымызды білдіреміз, — дейді спортшылар.
М.ТАБЫН.