«Оксана» — бірінші!
Фестиваль
«Оксана» ұлттық-мәдени орталығы IV халықаралық «Мы вместе, мы одна семья» фестивалінде І орын иеленді. Бұл туралы өңірлік коммуникациялар қызметінде өткен баспасөз конференциясында «Қоғамдық келісім» КММ директоры Нұрхан Ағниязов хабарлады.
IV халықаралық «Ми разом, ми одна сім᾿я!» фестивалі Нұр-Сұлтан қаласында Қазақстан халқы Ассамблеясының қолдауымен «Рада украинцев Казахстана» заңды тұлғалар бірлестігі және «Оберег» украиндар қоғамы» бірлестігінің ұйымдастыруымен өтті.
Қазақстан, Украина, Ресей және Польша мемлекеттерінің этномәдени бірлестіктерін жинаған іс-шара қоғамдық келісім мен жалпыұлттық бірлікті, Қазақстанның бауырлас халықтары арасындағы достық байланыстарды нығайту, қазақстандық этностардың мәдениетін көпшілікке тарату, азаматтық бірегейлікті қалыптастыру мақсатында өткізілді.
— Фестиваль аясында Ақтөбе облысының «Оксана» украин ұлттық-мәдени орталығы сәндік-қолданбалы өнер көрмесінде украин халқының ұлттық бұйымдарын, сондай-ақ жастар жылына арналған «ХХІ ғасыр жастары —объективте» атты фотокөрмеге өз жұмыстарын ұсынды. «Барвинок» балалар үлгілі фольклорлы би ансамблі мен «Оксана» халықтық хоры 1-орынға ие болып, Қазақстан халқы Ассамблеясы төрағасы мен Украина елшілігінің атынан Алғыс хаттармен марапатталып, бағалы сыйлықтарға ие болды, — дейді «Қоғамдық келісім» КММ директоры Н.Ағниязов.
Естеріңізге сала кетейік, «Оксана» украин орталығы 1996 жылы Ақтөбе облысының ҚХА жанынан құрылды. Жыл сайын құрамына 110-нан астам адам кіретін ұлттық-мәдени орталық 4 ауқымды мерекелік іс-шара өткізеді. Сондай-ақ, украин этномәдени бірлестігінің жанында қазақ және украин тілдерін үйрететін жексенбілік мектеп жұмыс істейді.
А.БАЛЖАНАЙ.