Облыста 900 Ауған соғысы ардагері тұрады
Брифинг
Ауғанстаннан Кеңес әскерінің шығарылғанына 30 жыл толуына орай Ақтөбеде төрт кітап жарыққа шықты. «Екі ғасырдың батырлары», «Біз өз антымызды орындадық», «О павших в Афганистане», «Прошедшие Афган…» кітаптарында 1979-1989 жылдары Ауғанстанда әскери борышын өтеген кеңес жауынгерлері туралы анықтамалық-библиографиялық деректер қамтылған. Сондай-ақ сол жақта ерлікпен қаза тапқан жауынгерлердің де өмірбаяндық деректері, фотосуреттері де жарияланған. Бұл туралы Өңірлік коммуникациялар қызметінде өткен баспасөз конференциясында облыстық ішкі саясат басқармасы басшысының орынбасары Айбек Көпенов мәлімдеді.
1979-1989 жылдары Ауғанстанда әскери борыштарын өтеуге Қазақстаннан шақырылған 22 мың жауынгердің бір жарым мыңнан астамы Ақтөбе облысының тұрғындары еді. Олардың 34-і мүгедек болып оралды, 26 ақтөбелік сол жақта ерлікпен қаза тапса, біреуі хабарсыз кетті. Бүгінде облысымызда 900-ге жуық ауған соғысының ардагері тұрады. 100-ден астам ақтөбелік жауынгер ерекше ерлік көрсеткендері үшін әскери наградаларға ие болды.
Жергілікті атқарушы органдар ауғандық жауынгерлерге пәтер беруде, дәрі-дәрмекпен қамтамасыз етуде көмек көрсетіп келеді, сондай-ақ ауғандық интернационалист-жауынгерлер жер және мүлік, автокөлік салық төлемдерінен босатылған.
Бүгінде Ауған соғысы ардагерлерінің құрметіне Ақтөбе қаласы мен барлық аудандарда бокстан, футболдан, жүзуден жарыстар өтіп жатыр. 13 ақпанда қалалық Мәдениет үйінде интернационалист-жауынгерлерге «Ауғанстаннан Кеңес әскерлерін шығаруына 30 жыл толуына орай» мерейтойлық төсбелгілері табыс етіліп, 15 ақпанда Ауған жауынгерлері ескерткішінің алдында митинг өтеді.
— Аз қамтылған және көпбалалы отбасыларға материалдық көмек көрсету бойынша бірқатар қайырымдылық акцияларын өткізуді жоспарлап отырмыз, — деді «Боевое братство» шектелген соғыс жауынгерлер одағы қоғамдық қорының төрағасы Гумер Галеев.
— Еуразиялық Экономикалық Одақ шеңберінде Ауған соғысына қатысқан жауынгерлердің ерекше мәртебесі туралы мәселе көтерілді, — дейді «Ақтөбе облыстық ауғандық жауынгерлер облыстық қоғамының» жетекшісі Аслан Балқасынов.
Ауған соғысы ардагерлерінің мәртебесі туралы Парламентте де мәселе көтеріліп жатыр. Мәжілістегі «ауғандық» қос депутат-генерал Бақытжан Ертаев пен Бақытбек Смағұлов өз қаруластарының мемлекет назарына алатын мәселелерін күн тәртібіне көтеріп жүр.
Астанада өтетін Ауғанстаннан кеңес жауынгерлерінің шығарылуының 30 жылдығына арналған шараға біздің облысымыздан 5 жауынгер қатысады.
Баян СӘРСЕМБИНА.