Мемлекеттік қызметкерлер жалақысын көтеру үшін 2 миллиард теңге бөлінеді
Облыста мемлекеттік қызметкерлердің жалақысын көтеру үшін 2 миллиард теңге бөлінеді. Бұл туралы ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Ақтөбе облысы бойынша департаменті басшысының орынбасары Рафхат Бисенов мәлімдеді.
— Өздеріңіз білетіндей, Мемлекет басшысы Нұрсұлтан Назарбаев мемлекеттік қызметкерлердің жалақысын өсіруді, бұл міндетті өңірлік деңгейдегі резервтер есебінен шешуді тапсырған болатын. Бұл мақсатқа Ақтөбе облысы 2 миллиард теңге қарастырып отыр. Оның 1,9 миллиард теңгесі мемлекеттік органдардың және бағынышты ұйымдардың шығындарын оңтайландыру, ал 9 миллион теңге — әлеуметтік зерттеулер мен мемлекеттік тапсырыстың құнын төмендету есебінен жүргізілмек, — деді Р.Бисенов. Оның айтуынша, 2019 жылдың екінші жартыжылдығынан бастап жалақы көтеру жоспарлануда.
Арайлым НҰРБАЕВА.
