Түркиялық профессорлар ота жасады
«Бақытты бала» жобасы аясында Ақтөбе медициналық орталығында Түркиядан келген профессорлар маммология және пластикалық хирургия бағыты бойынша шеберлік класын өткізді.
Анкара қаласындағы Башкент университеті медициналық орталығының профессоры, онкохирург, трансплантолог, маммолог дәрігер Седат Илдирим мен професссор, пластикалық хирург Ахмет Чагри Уйсал ақтөбелік дәрігерлерге жаңа технологиямен жұмыс істеу тәсілін үйретіп, өз тәжірибелерімен бөлісті.
Екі күн бойы дәрігерлер қала тұрғындарын қабылдады. Сүт безі ауруы және түрлі косметикалық ақаулары бар тұрғындарды, оның ішінде балаларды қарап, кеңес берді. Алғашқы күні жиырма адам кеңес алды. Кеңес беру кезінде төменгі жақ сүйегінің косметикалық және функционалдық кемістігі бар және туабітті буын патологиясына шалдыққан науқасты тексерді. Екі кезеңнен тұратын операция жасалды. Сүт безінің ауруына шалдыққан өзге емделушілерге органдарын сақтай отырып операция жасалды. Барлық отаны Түркиядан келген дәрігерлер тегін жасады. Барлығы бес адамға ота жасалса, оның ішінде екеуі — бала.
Бұндай шеберлік класын алдағы уақытта тағы да өткізу жоспарда бар. Сондай-ақ Анкарадағы клиникада ақтөбелік дәрігерлерді маммология мен пластикалық хирургияның заманауи проблемалары бойынша оқыту да жоспарланып отыр.
Сонымен қатар күрделі патологиясы бар бес балаға Башкент университетінің базасында операция жасалады. Барлық шығынды университет көтереді.
Кәмшат ҚОПАЕВА
