Мейрамбек — күміс, Нұрислам қола медаль алды

Азия чемпионаты

10-14 мамыр күндері Үндістанның Нью-Дели қаласында күрес түрлерінен Азия чемпионаты өтті.

Грек-рим және еркін күрестен ұлттық құрамалар сапында ақтөбелік балуандар да осы байрақты бәсекеге аттанған еді. Атап айтқанда, Азия чемпионатында грек-рим күресінен 59 кг салмақ дәрежесі бойынша Мейрамбек Айнағұлов пен еркін күрестен 57 кг салмақ дәрежесі бойынша Нұрислам Санаев өнер көрсетті. Және екеуі де сәтті өнер көрсетіп, Мейрамбек — күміс, Нұрислам қола жүлдеге ие болды.

Мейрамбек Айнағұлов финалға дейін жарқын жеңістермен жеткенімен, өкінішке қарай, финалда жапон балуаны К.Фумитеден 2:1 есебімен жеңілді. Ал Нұрислам Санаев қола медаль үшін болған белдесуде Ұ.Жолдашбековті 7:2 есебімен ұтты.

13 мамыр күні Мейрамбек Айнағұловты ақтөбеліктер әуежайда салтанатты түрде күтіп алды. Бұған дейін Мейрамбек жастар және әскерилер арасында әлем чемпионы атанған еді. Азия чемпионатының күміс жүлдесі — Мейрамбектің ересектер арасындағы жарыстардағы әзірге ең ірі жеңісі. Нұрислам да бұған дейін қазақстандық жанкүйерлерді тек әлем чемпионаттарындағы бесінші орынмен ғана қуантқан еді. Бұл қола — оның байрақты бәсекелердегі алғашқы жүлдесі.

Балуандарымыз болашақта өз жанкүйерлерін бұдан да үлкен табыстармен қуантады деп үміттенеміз.

Өз тілшіміз.