Отан қорғаушылар күні кеңінен тойланады!
Үстіміздегі жылдың 6-7 мамырында қаламызда Отан қорғаушылар күніне арналған іс-шаралар өтеді.
Бұл күндері барлық әскери бөлімшелер мен Т.Бигелдинов атындағы әуе қорғанысы күштерінің әскери институтында, қорғаныс істер жөніндегі департаментте салтанатты жиналыстар өтеді.
Бүгін сағат 15.00-де облыстық «Алақай» қуыршақ театрында №30238 әскери бөлім жеке құрамының концерттік бағдарламасы болады. Бұл мерекелік шараны Ұлы Отан соғысының ардагерлері мен Ә.Молдағұлова атындағы Ақтөбе гуманитарлық колледждің оқушылары тамашалай алады.
6 мамыр күні сағат 9.00-де №6655 әскери бөлімінде «Армия балаларға» атты акциясы ұйымдастырылып, қаладағы №16, 34 мектеп оқушыларының қатысуымен ашық есік күні өтеді. Көркемөнерпаздардың концерттік бағдарламасы мен әскери техника көрмесі де осы жерде ұйымдастырылады.
Бұл күні сағат 15.00-де №30238 әскери бөлімінің алаңында Ақтөбе гарнизонының әскери құрамалары арасында қатардағы әндер байқауы ұйымдастырылады. Сол күні сағат 16.00-де «Сарбаз батыр» спорттық жарыстары өтеді.
Отан қорғаушылар күніне арналған патриоттық әндер фестивалін 6 мамыр күні сағат 15.00-де «Геолог» Мәдениет үйінде тамашалауға мүмкіндік бар.
7 мамыр күні Т.Бегелдинов атындағы әуе қорғанысы күштерінің әскери институтында №1, 17, 23, 27 мектеп оқушылары мен Алғадағы балалар үйі тәрбиеленушілерінің қатысуымен ашық есік күні өтеді. Бұл жерде әскери техника байқауы ұйымдастырылады.
Қала әкімінің баспасөз қызметі.