Автотұрақ көбейді, шамдар жаңартылды
Ақтөбе қаласындағы Әлия Молдағұлова және Сәңкібай батыр даңғылдары қиылысындағы айналма көлік жолының құрылысы 10 қазан күні аяқталады.
«Ақтөбе қалалық тұрғын үй, коммуналдық шаруашылық, жолаушылар көлігі және автомобиль жолдары» мемлекеттік мекемесінің өкілі Бекболат Нұрашевтің айтуынша, жыл басынан бері қаладағы 19 нысанға күрделі жөндеу жұмыстарын жүргізу жоспарланған болатын. Солардың бірі — Әлия Молдағұлова даңғылындағы қосымша жолды жөндеу.
— Бұл іске жауапты мердігер мекеме — «КТП» жауапкершілігі шектеулі серіктестігі. Қазір Әбілқайыр хан даңғылынан Есет батыр көшесіне дейінгі аралықтағы жолға жаңадан асфальт жамылғысы төселіп, жаяу жүргінші жолы жөнделіп жатыр. Әлия Молдағұлова даңғылындағы қосымша жолдың бойындағы автотұрақтардың саны да көбейді. Жол бойындағы көше шамдары түгелдей жаңартылды. Әлия Молдағұлова және Сәңкібай батыр даңғылдары қиылысына салынып жатқан айналма көлік жолының құрылысы бастапқыда 15 қазанға дейін жоспарланған болатын. Дегенмен бұл іске жауапты мердігер мекеме «АссанаСтройСервис» жауапкершілігі шектеулі серіктестігі жұмысшыларының тынымсыз еңбегінің нәтижесінде құрылыс жұмыстары 10 қазан күні аяқталып, даңғылды ашуды жоспарлап отырмыз, — деді Бекболат Нұрашев.
Арайлым НҰРБАЕВА.
