Білім

Тұжырымдама түйткілдері талқыланды

Облыс әкімі Ералы Тоғжановтың төрағалығымен өткен жиында Қазақстан Республикасында 2022-2026 жылдарға арналған білім беруді дамытудың тұжырымдамасының Ақтөбе облысында жүзеге асырылу барысы қаралды. 

Тұжырымдама мектепке дейінгі, орта, кәсіптік білім беруді дамытудың 4 бағытынан тұрады. Ақтөбе облысында Тұжырымдаманы жүзеге асыру аясында 2026 жылға дейін 2,7 млрд теңгеге мектептерді типтік спорттық құрал-жабдықтармен және инвентарлармен толық жабдықтау, 2,5 млрд теңге сомасында балабақшалардың материалдық-техникалық базасын жаңарту, сондай-ақ барлық ауыл мектептерін жоғары жылдамдықтағы интернетпен қамтамасыз ету бойынша ауқымды жұмыстар жүргізілетін болады. Қазіргі таңда облыстың 19 ауылдық мектебінде (7%) интернет жылдамдығы секундына 4 Мбиттен аспайды.

Фостерлік отбасы институтын енгізуге дайындық жұмыстары жүргізілуде. Айта кету керек, жыл сайын жетім балалар мен ата-анасының қамқорлығынсыз қалған балалардың саны едәуір азайып келеді. Тәуелсіздік жылдарында Ақтөбе облысында осы санаттағы балалар саны 58 пайызға азайған.

Инклюзивтік білім беруге жағдай жасауға ерекше көңіл бөлінеді. Осы мақсатта кедергісіз орта қалыптастыру үшін балабақшаларда 23 арнайы түзетім топтары, ал 12 мектепте инклюзивтік білім беруді дамыту бойынша ресурстық кабинеттер ашылады, 600 педагог біліктілікті арттыру курстарынан өтеді.

Сонымен қатар Тұжырымдама аясында мұғалімдердің кәсіби және мәдени капиталын арттыру, бәріне бірдей тең бастапқы мүмкіндіктер жасау, орта білім беру жүйесі арқылы саналы және жан-жақты дамыған азаматты қалыптастыру, жастарды білім мен еңбек нарығына интеграциялау мақсатында бірқатар шаралар жүзеге асырылуда.

Облыс басшысы білім басқармасына барлық бағыттағы жұмысты күшейтіп, бақылауға алуды тапсырды. Жиында басқа да өзекті мәселелер талқыланды.

Облыстық мемлекеттік сәулет-құрылыс бақылау басқармасының басшысы Оксана Сопрун Мәртөк ауданының Қаратоғай ауылы және Қобда ауданының Сарыбұлақ ауылындағы су тасқыны шайып кеткен көпірлерді қалпына келтіру шаралары туралы баяндады. Қазір өткелдер уақытша қалпына келтірілді. Сарыбұлақ ауылындағы көпірді өткізу қабілетін арттыра отырып қалпына келтіру елді мекенге баратын жолды орташа жөндеу жобасы аясында жоспарлануда. Қазіргі уақытта жоба сараптамадан өтуде. Қаратоғай ауылының көпірі демеушілік қаражатын тарту арқылы қалпына келтіріледі. Өткелді 1,5 метрге көтеріп, мұз қабаттарының еркін өтуі үшін 20 метрлік аралық жасау жоспарлануда. Қазіргі таңда есеп жұмыстары жүргізілуде.

Қала аумағын абаттандыру және жолдарды жөндеу мәселелері күн тәртібінен түспейді. Жиын барысында Ақтөбе қаласы әкімдігі мен оның Алматы және Астана аудандарының әкімдіктеріне көп қабатты үйлердің аулаларының санитарлық жағдайын тез арада реттеу жөнінде нұсқау берілді. Ал облыстық жолаушылар көлігі және автомобиль жолдары басқармасына үш күннің ішінде оңтүстік айналма жолдың Елек өзені арқылы өтетін көпірден Сүт зауыты шағын ауданына дейінгі аумағында және Ақтөбе-Болгарка-Шұбарқұдық тасжолында ағымдағы жөндеу жұмыстарын жеделдетуді тапсырды.

Д.Қазихан.

Басқа жаңалықтар

Пікір үстеу

Э-пошта мекенжайыңыз жарияланбайды.

Back to top button