Битум жеткізу мәселесі шешіледі
«Өңірде битум жеткізу мәселесі шешілетін болды. Бұл туралы облыс әкімі Ералы Тоғжановтың өңірде жол жөндеумен және салумен айналысатын 20 мердігер мекеменің өкілдерімен өткізген жиналысында мәлім болды», — деп хабарлайды облыс әкімінің баспасөз қызметі.
Жиынға сондай-ақ мемлекеттік органдардың басшылары, Ақтөбе қаласы мен аудан әкімдері қатысты.
Өңір басшысы Шымкент қаласындағы битум зауытымен келісім жасалғанын, кәсіпорынның облыс сұранысын толық қамтамасыз етуге дайын екенін атап өтті.
«Біздің міндетіміз — барынша қысқа уақытта облыс орталығындағы жол мәселесін реттеу. Қазір жұмысты сапалы әрі көрсетілген мерзімде орындауға қай мердігер дайын екенін шешу үшін олардың әрбірімен сөйлесу керек», — деп атап өтті облыс әкімі.
Ақтөбедегі ерекше бақылаудағы жобаларының қатарында Оңтүстік айналма жолы, Ақтөбе-Орск тасжолын, Тәуелсіздік даңғылы мен Мұстафа Шоқай көшесін жөндеу және құрылысын жүргізу жұмыстары бар.
«Бір жарым ай қалды, қарқынды жұмыс істеу керек. Мен өз тарапымнан жан-жақты қолдау көрсетуге дайынмын», — деген Ералы Тоғжанов республикалық жолдарды салуға және жөндеуге қажет битуммен қамтамасыз етуде проблема болмайтынын айтты.
