Егін жинау науқаны жалғасып жатыр
Мәртөк
Облыс әкімінің орынбасары Жақсығали Иманқұлов Мәртөк ауданына жұмыс сапарымен барды. Аудандағы егін жинау науқанымен танысып, бірқатар шаруа қожалықтарын аралады.
Қазір жеміс-жидек пен көкөністің саудасы қызып тұрған шақ. Мәртөкте 2017 жылдан бері көкөніс өсірумен айналысатын шаруашылықтардың бірі — «Мәртөктің эко-өнімдері» жеке кәсіпкерлігі. Шаруашылықта көлемі 12,5 текше метр болатын 4 ұңғыма бар. Биыл көктемде 5 гектар аумаққа құлпынай, 2 гектар жерге жүгері, 1 гектарға қара бүлдірген мен қарақат егіп, маусым айында 15 тонна өнім жинаған. Шаруашылық өнімдерін Ақтөбемен қатар, Атырау, Қостанай, Солтүстік Қазақстан өңірлеріне де экспорттады.
Ал «Рад-Агро» жауапкершілігі шектеулі серіктестігінде 502 ірі қара мал және 750 қой бар. Биыл жыл басында шамамен 2800 гектар жерге ауылшаруашылық дақылдарын еккен. «Родники-Агро» серіктестігі бидай, тары, күнбағыс, мақсары, судан секілді дәнді дақылдар егіп, бүгінде мол өнім алып отыр. Егін жинау жұмыстары 19 комбайнмен жүргізіледі. Сондай-ақ мұнда сыйымдылығы 14800 тонна астық сақтауға арналған 7 қойма мен астық тазалау машинасы бар.
Айта кетейік, Мәртөк ауданында апта сайын ауыл шаруашылығы өнімдерінің жәрмеңкесі ұйымдастырылады. Өткен сенбіде жәрмеңкеде 1,5 тонна қарбыз, 1 тонна қауын , 200 келі қияр, 100 келі қызанақ пен қырыққабат, ет және сүт өнімдері сатылды. Сондай-ақ бір бума шөп бағасы 500, ал бір тонна шөп (арбада) бағасы 50 мың теңгеден болды.
Жәрмеңкеде тауар өндірушілер барлығы 10 тоннадан астам түрлі өнім әкелді.
А.БОЛАТБЕК.