Саяхатшы Әйтеке би ауданына келді
- Әйтеке би
72 жастағы саяхатшы Сәрсенбай Қотырашов Қарағанды облысының Ұлытау ауылынан Әйтеке би ауданына жаяу жүріп келді.
Биыл 31 наурыз күні Ұлытаудан жолға шыққан саяхатшыны аудан тұрғындары мен жастар құшақ жая қарсы алды. Бұған дейін ол еліміздің Нұр-Сұлтан, Жезқазған, Қызылорда, Шымкент, Алматы, Павлодар, Қостанай секілді қалаларында болған. Ақсақал жол бойы қымыз ішіп, әлденіп алады екен. Ұзақ сапары үшін қажеттінің бәрі арбасында бар. Арасында шатырын тігіп, демалады.
— Менің үш мақсатым бар. Туған жерім Ұлытаудың тарихи-мәдени мұрасын насихаттау, қазақстандық қолөнершілердің тізімін жасау және қымыздың пайдалы қасиеттеріне жұртшылықтың назарын аудару. Жалпы еліміздің 18 өңірін аралауды жоспарлап отырмын, — дейді саяхатшы.
Сәрсенбай ата өз кезегінде аудан тұрғындарының қонақжайлылығына ризашылығын білдіріп, қызықты оқиғаларымен бөлісті, жастарға ақ батасын берді.
Күніне 40 шақырым жаяу жүретін саяхатшы сапарын қазан-қараша айларында аяқтауды жоспарлап отыр.
А.БОЛАТБЕК.