Ел намысын қорғаған Санжар

• Бәрекелді

Ақтөбедегі Назарбаев зияткерлік мектебінің оқушысы Санжар Хамитов халықаралық олимпиадада жеңімпаз атанып, ел намысын қорғады. Бұл — еліміздің тарихындағы қазақстандықтар еншілеген екінші алтын медаль.

Географиядан халықаралық олимпиадада (IGeO-2022) Ұлттық құрама қоржынына екі медаль салынды. Оның бірі — алтын, бірі — қола. Қола жүлдені шымкенттік Еркебұлан Тазабек еншілеген.

Биыл зияткерлік жарыстарды Франция мемлекеті ұйымдастырды. Білім бәйгесінде әлемнің 54 елінен 216 оқушы бақ сынады. Олар жазбаша, мультимедиалық тестілеу және картографиялық бейнелеу тапсырмаларын орындапты.

— География пәнінен халықаралық олимпиадаға бір рет болса да қатысқым келді. Сол себепті 9-сыныптан бері тынбай дайындалдым. Жарысқа әзірленгім келмеген, қатысқым келмеген кездер де болды. Жеңімпаз атанғанымды естігенде сенер-сенбесімді білмедім. Жеңіске жетуімнің құпиясы — үздіксіз іздену, табандылық, — дейді Санжар Хамитов.

Оған жарысқа дайындалуға былтыр халықаралық олимпиадада ел тарихында алғаш рет алтын медаль алған Рустам Валеев көмектесіпті.

Биылдан бастап халықаралық олимпиадалардың жеңімпаздары мемлекет тарапынан бұрын-соңды болмаған қолдауға ие болады. Ел абыройын асқақтатқан дарынды балаларды құттықтаған Оқу-ағарту министрі Асхат Аймағамбетов: «Оқушыларымыз халықаралық олимпиадаларда жетістіктерімен бізді қуантуды жалғасытырып келеді. Президенттің тапсырмасы бойынша қомақты ақшалай сыйақы төлеу және отандық ЖОО-ына ҰБТ тапсырмай-ақ қабылдау қарастырылып отыр. Алтын медаль алған оқушыға шамамен 4,5 млн теңге, күміс медальға 3 млн теңгеден астам, қола медальға 1,5 млн теңгеден астам сыйақы беріледі. Оқушыларды жарысқа дайындаған ұстаздар да төлемақы алады, — деп жазды әлеуметтік желісіндегі жазбасында.

Гүлжан Базылқызы.