Спорттық үйірмелердің бағасы неге қымбат?
Ойтүрткі
Ақбота ҚАЛДЫБЕК,
«Ақтөбе»
Егемен еліміздің ертеңгі болашағы бүгінгі жастар десек, дені сау ұрпақты тәрбиелеу — маңызды мәселе. Мектеп оқушыларының асыға күтетін жазғы демалысы басталып кетті. Осы ретте спорттық үйірмелер балалардың бос уақытын тиімді, қызықты өткізуіне септігін тигізіп қана қоймай, салауатты өмір салтына дағдыландырады.
Токио Олимпиадасынан кейін отандық спорттағы хал-ахуалымыздың төмен екені анық білінді. Мемлекет басшысы Қасым-Жомарт Тоқаев Токиода өткен Олимпиада қорытындысы бойынша отандық спортқа шұғыл әрі тиімді реформалар жүргізу қажет екендігін айта келе, бұқаралық және балалар спортын дамытудың маңыздылығына ерекше назар аударды.
Шетелдерде де балалар спортына ерекше көңіл бөлініп отырғанын әлемдік спорт додасының көрсеткіштерінен байқадық. Атап айтсақ, Өзбекстан елінің 19 жастағы өрені Улугбек Рашидов таэквондодан Олимпиада чемпионы атанды. 13 жастағы спортшы стрит бағдарламасының финалында бірінші орынды иеленді. Екінші орын алған 13 жастағы бразилиялық Раисса Леал да жанкүйерлерді өнерімен тәнті етті.
Қазақстанда балалар мен жасөспірімдерге арналған спорт секцияларының саны жеткіліксіз. Көптеген ауылда спорттық кешендер жоқтың қасы. Көңілге медеу болары — балаларды күреске, дзюдоға, боксқа, футболға дайындайтын спорт үйірмелері жұмыс істеп тұр. Әрі бұл спорт түрлеріне жеткіншектер көп барады. Бірақ бұдан басқа спорт түрлерін дамытуға ауылдық жерлерде лайықты деңгейде жағдай жасалмаған. Мәселен, Әйтеке би ауданының орталығында әлі күнге дейін балалардың спортпен шұғылдануына арналған спорт кешені жоқ. Ақтөбе қаласындағы Есет батыр шағын ауданы күн санап үлкейіп келеді. 40 мыңға жуық тұрғыны бар ауданда да балалардың бос уақытын тиімді өткізуге арналған спорттық нысандар жоқ.
«Ел болашағы — дені сау ұрпақ» дегенімізбен, қазіргі қазақ балаларының денсаулығы да дәрігерлерді алаңдатып отыр. Өйткені мектеп қабырғасындағы оқушылардың көбісінің омыртқасы қисайған. Бұдан басқа жеткіншектердің әр екіншісінде гастрит пен асқазанның ойық жарасы кездессе, елу пайызында қан айналым жүйесінің жұмысы бұзылған. Жылдан-жылға балалар әлжуазданып барады.
Қалалық жерлерде кейбір спорт үйірмесіне балаларын апаруға ата-ананың қалтасы көтермейді. Сондықтан жеткіншектер өздері қалаған спорт түрімен айналыса алмайды. Бағасы қымбат спорт үйірмелеріне көркем гимнастика, үлкен теннис, шайбалы хоккей, синхронды жүзу, мәнерлеп сырғанау жатады. Осыдан кейін бұл спорт түрлерінен ел намысын қорғауды сырттан келгендерге сеніп тапсырмасқа амал жоқ. Егер қолжетімді болмай тұрған осы спорт түрлеріне ерекше көңіл бөліп, дамытар болсақ, жеткіншектерді осы спорт түрлеріне баули алсақ, өзімізден де шын мықты спортшылардың көптеп шығуына жағдай жасалар еді. Ол үшін бірінші кезекте балаларға арналған барлық спорттық үйірмелер қолжетімді болуы керек. Жаттықтырушылардың қызметін жоғары бағалап, балаларды еркін жаттықтыруына жол ашқан дұрыс.
Ақтөбеде ақысыз спорт үйірмелері мүлде жоқ деуге болмайды. Бірақ ол жерлерде қатысушылар саны шектеулі. Жастардың спортқа бет бұруы тек саусақпен санарлықтай ғана спорт түрлерімен шектеледі. Бізде басқа дамыған елдердегідей барлық қызметтік орындарда спортзалдары жұмыс істемейді. Не болмаса қызметкерлерге спортпен шұғылдануға мүмкіндіктер аз қарастырылған тіпті мүлде қарастырылмаған деуге болады.
Мемлекеттің Әнұраны шетелде екі жағдайда шырқалады. Біріншісі, Президенттердің кездесуі кезінде, екіншісіден, спортшыларымыз бәсі биік жарыста жеңіске жеткен тұста. Сондықтан дарынды спортшыларды дайындау үшін балаларға арналған спорт үйірмелерінің бағасын халықтың мүмкіндігіне қарай қолжетімді ету керек.
Спорт — денсаулық кепілі. Ал «кепіл» жоқ жерде денсаулық нашар болады. Халықтың денсаулығы нашарласама, аурухана көбейеді. Демек, аурухана санын азайту үшін спорттық нысандарды көбірек салып, оның қызметін қолжетімді қылу керек.