Отбасы құндылықтары дәріптелді
Семинар
Облыстық жастар ресурстық орталығының ұйымдастыруымен 15 мамыр — Халықаралық отбасы күніне орай жас отбасыларға арналған «Happy together» атты семинар-тренинг ұйымдастырылды.
— Облыстық семинар-тренингті өткізудегі негізгі мақсатымыз — отбасы құндылықтарын насихаттау, соңғы кезде жас отбасылар арасында белең алып отырған ажырасуды азайту. Ажырасу ешқашан жақсылықпен аяқталмайды, өйткені бұл жерде екі тарап зардап шегеді, — дейді облыстық жастар ресурстық орталығының басшысы Нұрлыбек Мусин.
Семинарға 18-29 жас аралығындағы қала және аудан жастары қатысты.
Іс-шара барысында «Халықаралық құқық қорғау орталығы» қоғамдық бірлестігі Медиация орталығының кәсіби медиаторы Айнұр Аймағанбетова, облыстық ғылыми-тәжірибелік орталығының психологиялық-әлеуметтік қолдау бөлімінің әдіскері Медеухан Жасжанова және ақпарат саласының үздігі, Ақтөбе қалалық қоғамдық кеңесінің мүшесі Жаңалық Ахаш жас отбасыларға кеңестерін беріп, тренинг өткізді.
Семинар-тренингке қатысу үшін Шалқар ауданынан арнайы келген жас жұбайлар Ержігіт пен Бибінұр Қазымовтар отбасында алдымен сыйластық пен түсіністіктің болуы керек екендігін айтады.
— Мен мемлекеттік қызметкермін, келіншегім аудандық көркем сурет лицейінде сабақ береді. Осындай шара ұйымдастырылатынын естігенде қатысып көруге бел будық. Өзіміз секілді жас отбасылармен танысып жатырмыз. Мұндай шаралардың жастарға берері мол, — дейді ол.
Шара барысында психологиялық ойындар ұйымдастырылды.
Ақбота ҚАЛДЫБЕК.