«S Sistem» Ақтөбе облысындағы көлік-логистикалық орталығы құрылысына 50 млн доллар инвестициялауға ниетті
Ақтөбе облысының әкімі Оңдасын Оразалин 5 наурыз күні біздің өңірге 50 млн АҚШ долларын инвестициялауды жоспарлап отырған «S Sistem» түрік компаниясының президенті Хусейн Барлинді қабылдады.
Атап айтқанда, «S Sistem» Ақтөбе облысында әуе хабы бар ірі көлік-логистикалық орталығын салуға ниетті.
«Ақтөбе облысының географиялық орналасуына байланысты транзиттік хаб ретінде дамуының келешегі зор. Біз өз тарапымыздан жобаға тиісті қолдауды көрсетеміз»,- деді Оңдасын Оразалин.
Өз кезегінде Хусейн Барлин өңірдің көлік-логистикалық инфрақұрылымын инвестициялауда қызығушылығы жоғары екенін атап өтті.
«Салғымыз келіп отырған логистикалық хаб Қазақстан мен көршілес елдер арасындағы тауар мен жүк айналымын көтеруге мүмкіндік туғызатын болады. Ақтөбе өңірін дамытуға оң әсерін тигізетініне сенімдімін»,- деді Хусейн Барлин.
Кездесу барысында тараптар инвестициялық жобаларды жүзеге асыру бойынша өзара ынтымақтастық туралы меморандумға қол қойды.
Облыс әкімінің баспасөз қызметі.