Демалыс ұзартылды, тест тапсыру уақыты шегерілді

Төтенше жағдай кезінде облыстағы білім саласының мекемелері қалай жұмыс жасайды? Қаңтардың 10-ы күні өтуі жоспарланған ұлттық бірыңғай тестілеу қашан ұйымдастырылады? Осы және басқа да өзгерістер туралы облыстық білім басқармасының басшысы Жолдас Батырханнан білген едік.

Барлық балабақша жұмыс жасап жатыр 

— Мектеп оқушыларының қысқы каникулы кеше, яғни қаңтардың 10-ы күні аяқталуы тиіс-тін. Дегенмен елдегі жағдайға байланысты Білім және ғылым министрлігінің бұйрығымен қысқы демалыс қаңтардың 17-сіне дейін ұзартылды. Ал мектеп мұғалімдері каникул кезінде елді мекендегі жағдайға байланысты қашықтан немесе дәстүрлі форматта жұмыс істейтін болады, — дейді басқарма басшысы.

Оның айтуынша, облыстағы барлық балабақшажұмыс істеп жатыр.Колледждер мен жоғары оқу орындарының студенттері 24 қаңтарға дейін каникулда болады.

— Төтенше жағдай кезінде өңірде ешбір білім беру нысаны бүлінген жоқ. Жарық бар. Жылу, су жүйесі де қалыпты жұмыс жасап тұр, — дейді Ж.Батырхан.

ҰБТ қашан өтеді?

Қаңтар айындағы ұлттық бірыңғай тестілеуге қатысу үшін өтініштерді қабылдау қаңтардың21-іне дейін ұзартылды.

— Өтініштерді қабылдау желтоқсанның 24-і күні басталған-ды. Қаңтардың 15-і күні аяқтау жоспарланған болатын. Дегенмен жағдайға байланысты және талапкерлердің мүдделерін ескере отырып, Білім және ғылым министрлігі мерзімді 21 қаңтарға дейін ұзарту туралы шешім қабылдады, — дейді басқарма басшысы.

ҰБТ-ны өткізу мерзімі де өзгертілді. Қаңтардың10-ы күні басталады деп жоспарланған тестілеу тапсыру уақыты қаңтардың  25-іне шегерілді. ҰБТ тапсыру ақпанның22-сі күніаяқталады.

Айта кету керек, бұл тестілеуге ақылы негізде жоғары оқу орындарына қабылданған, жазғы ҰБТ нәтижелері бойынша шекті ұпай жинай алмағандар, сондай-ақ мектеп бітіретін түлектер университеттерге ақылы негізде түсу үшін  қатысады.

Министрлік магистратура мен докторантураға қабылдау мерзімін де қаңтардың 24-іне  дейін ұзарту туралы шешім қабылдады.

Балалар қауіпсіздігі басты назарда   

— Балалардың қауіпсіздігі басты назарда. Осы шешімдердің барлығы да балалардың өмірі мен денсаулығын сақтау мақсатында қабылданып отыр.

Ата-аналардан балаларын қараусыз қалдырмауын сұраймыз. Қалыптасқан жағдай тұрақтанғанға дейін балаларды үйден шығармау керек, — дейді Жолдас Батырхан.

Айта кету керек, балалардың құқығын қорғауға байланысты барлық сұрақ бойынша Білім және ғылым министрлігі Балалардың құқығын қорғау комитетінің 8 7172-74-25-28, 8​ 776-170-7383, 8​ 777​-183-6567, 8-701​-378- 66-29​ жедел желісіне хабарласуға болады.

Гүлжан Базылқызы.