Облыс әкімі кәсіпорындар мен мектептерді аралады
Бейсенбі күні облыс әкімі Оңдасын Оразалин жұмыс бабымен Ақтөбе қаласын аралады.
Өңір басшысы Ақтөбе қаласында кәсіпкерлікті дамыту бағдарламасы аясында мемлекеттен қолдау алған кәсіпорындарды қарап шықты.
«М.Стиль» ЖШС-ның өзі желімденетін этикеткалар мен иілгіш пленка қаптамаларын шығаратын цехы 19 жылдан бері жұмыс істейді. Осы жылы кәсіпорын құны 600 мың еуро тұратын соңғы буынды италиялық құрал-жабдықтар сатып алған. Кәсіпорынға «Даму-Өндіріс» мемлекеттік бағдарламасы аясында жеңілдетілген несие түріндегі қаржылық қолдау көрсетілді.
«Жаңа құрал-жабдық өндіріс сапасын жақсартып, өндіріс жылдамдығын екі есе өсіруге мүмкіндік береді. Біз екінші рет мемлекет қолдауының арқасында материалдық-техникалық жағынан жарақтанып отырмыз, бес жыл бұрын сол кездегі үздік жапон техникасын сатып алғанбыз. «Даму» қоры арқылы жұмыс жасаған қолайлы, себебі пайызы төмен, сонымен қатар кепілге мүлік қоймауға болады», — деді цех басшысы Меңдіғали Жұмағұлов.
Мұнда 25 адам жұмыспен қамтылған. Негізгі тұтынушылар — азық-түлік, фармацевтикалық және басқа да өнімдерді өндірушілер. Негізгі өткізу нарығы – Ақтөбе облысы. Атырау, Маңғыстау, Батыс Қазақстан, Қарағанды облыстары мен Шымкенттен де ірі тапсырыс берушілер бар.
Сондай-ақ өңір басшысы жеке кәсіпкер Жанат Бекбауованың еттен дайындалған жартылай өнімдерді шығаратын цехының қызметімен танысып шықты. Цехтың жобалық қуаттылығы — айына 3 тонна. Мұнда 18 адам жұмыс істейді.
«Даму-Өндіріс» және «Бизнестегі әйел» бағдарламасы сияқты өндірістің қалыптасу кезеңдерінде біз үшін күшті серпін болды. Мемлекеттің жан-жақты қолдауының арқасында бүгінде аяққа нық тұрдық», — деді Жанат Бекбауова.
Ол сондай-ақ өңір басшысынан консервіленген және шұжық өнімдерінің қосымша желісін ашуға мүмкіндік беретін мал сою цехына жер телімі қажет екенін сұрады.
Оңдасын Оразалин қала әкімі Асхат Шахаровқа осы сұрақты шешуін тапсырды.
«Акватория» ЖШС суды тазартатын модульді қондырғылар мен жылыту пункттерін шығарады. Өндіріске салынған инвестиция көлемі — 1,2 млрд теңге. Мұнда жылына 300 қондырғыға дейін шығаруға болады. 48 адам жұмыспен қамтылған.
Кәсіпорын басшылығы облыс әкіміне тұрғын үйлердегі судың қарбалас уақыттардағы төмен қысымына, сонымен қатар жылу беруді реттеуге байланысты проблемалардың шешіледі деп жоспарланған жобаларымен таныстырды.
ЖШС басшысы Дмитрий Шрамко: «Балаларым мектепке барады, олар мектепте ыстық екенін айтады. Қатты қыздыру — жылыту маусымындағы негізгі проблема. Қызмет жеткізушінің әр нысанның қызуын жеке-жеке реттеп отыратын мүмкіндігі жоқ. Ұсынылып отырған жүйе бұл сұрақты шеше алады. Жылу беру жағы әр ғимарат бойынша жеке-жеке реттелетін болады, бұл жылуға кететін шығынды 50 пайыз үнемдеуге мүмкіндік береді.
Осыны мемлекеттік мекемелерге, мектептерге және балабақшаларға енгізуді ұсынып жатырмыз. Біздің есеп бойынша бұл жоба, жылуға төленетін ақшаны үнемдеудің арқасында, екі жылыту маусымының ішінде өз құнын ақтайды. Бұдан бөлек бұл экологияға оң әсерін тигізеді, өйткені газ шығыны мен қоршаған ортаға лақтырылған қалдықтар көлемін төмендетеді», — деп атап өтті.
«Бұл жоба бюджет қаражатын, электр энергиясын үнемдеп, жалпы, жасыл экономиканың бізге қойған міндеттерін шешіп береді. Оны қолдау керек. Бұдан тұтынушы мен коммуналдық қызмет ұтады», — деген өңір басшысы жауапты мемлекеттік органдардың басшыларына тиісті тапсырмалар берді.
Оңдасын Оразалин үш ауысымда оқыту проблемасын шешкен №23 мектепке жапсарластырып салған құрылысты қарап шығып, мектеп маңайындағы аумақты абаттандыруға көңіл бөлуді тапсырды.
Бүгінде №23 мектепте 2400-ден аса бала оқиды, ал ғимарат бір ауысымда 800 баланың келуіне арналған.
Облыс әкімінің тапсырмасымен бір ауысымда 500 орынға арналған қосымша ғимараттың құрылысы басталды. Осылайша мектеп екі ауысымдық оқуға көшті. Жаңа корпуста 26 оқу кабинеті және спорт залы бар. Ол да заманауи қауіпсіздік жүйелерімен жарақтанған.
Айта кетейік, жыл басында облыс бойынша үш ауысымда оқып жатқан 9 мектеп болса, қосымша ғимарат салудың арқасында жыл соңына дейін олардың саны төртке дейін азаймақ.
Оңдасын Оразалин сыныптарды қарап шығып, оқушыларға мықты денсаулық пен сабақтарын жақсы оқып, елінің лайықты азаматтары болып өсуді тіледі.
Өңір басшысы Қурайлы тұрғын үй алабында болып, су, электр және газ желілерінің екінші кезегінің құрылыс барысымен танысты. Тұрғын үй алабын коммуналдық желілермен қамтамасыз ету үшін мемлекеттен 336 млн теңгеге жуық қаражат бөлінген. Оңдасын Оразалин жобаларды биылғы жылдың қараша айында аяқтауды тапсырды.
Қурайлыда облыс әкімі футбол алаңын да қарап шықты. Бұл футбол мектебінде елу бала бар.
Облыс әкімі жас футболшылармен әңгімелесіп, олардың оқудағы және спорттағы жетістіктеріне қызығушылық танытты, спортқа қажет құрал-саймандар тарту етті.
«Бізге нағыз керегі — осы. Көгалы жақсы, алаңы қолайлы, сынап көрдік. Осы үшін және жалпы футболды дамытқаныңыз үшін рақмет. Біздің «Ақтөбе» клубымыз қалай дамып жатқанын көріп жүрміз. Осындай балалардан да болашақ чемпиондар шығады деп ойлаймын. Әрі қарай да қолдайтыныңызға сенеміз», — деді Қурайлы футбол клубының негізін салушы Дамир Шарупов.
Жергілікті ақсақалдар балаларына қамқорлық көрсетіп, тұрғын үй алабын инженерлік инфрақұрылыммен қамтамасыз еткені үшін алғыстарын білдірді.
Ақтөбеде көп қабатты үйлердің аулаларының аумағын жөндеу жұмыстары белсенді түрде жалғасып жатыр. Облыс әкімі Тұрғындар қалашығы ауданының Тургенев көшесіндегі жұмыстардың барысымен де танысып шықты.
Биыл қазан-қараша айларында «ИнформСтройСервис» ЖШС мердігер мекемесі Тұрғындар қалашығында жалпы алаңы 28 мың шаршы метрден асатын барлығы 32 ауланы жөндейтін болады. Олардың қатарында Тургенев көшесіндегі 11 аула және №19 орта мектептің көлік тұрағы бар.
Айта кету керек, былтыр бұл аулаларға балалар алаңдары орнатылған еді, биыл аулаларға асфальт төселді, көлік тұратын орындар жасақталды.
Жыл соңына дейін облыс орталығында 220 аула жөнделіп, 67 балалар алаңы орнатылмақ.
Облыс әкімінің баспасөз қызметі.
