Қаладағы құрылыстар қарқынды жүруде

«Бейсенбі күні облыс әкімі Оңдасын Оразалин Ақтөбе қаласын
абаттандыру және инфрақұрылымдық дамуы бойынша бірқатар жобалардың жүзеге асырылуымен танысты», — деп хабарлайды облыс әкімінің баспасөз қызметі.
Жұмыс сапары «Нұр Ақтөбе» тұрғын үй алабындағы өрт сөндіретін автокөлік
құралдарына арналған тұрақтың құрылыс барысымен танысудан басталды.
«Қала аумағы үлкейіп келеді, соның ішінде қазіргі таңда Қарғалыда
орналасқан өрт сөндіру бөлімі қызмет көрсететін «Нұр Ақтөбе» тұрғын үй алабы да бар. Бұл жер айтарлықтай қашық, біз үлгермейміз, сондықтан өрт сөндіру бекетін ашу қажеттілігі туды», — дейді төтенше жағдайлар департаменті басшысының міндетін атқарушы Қайрат Қасымов.
Өрт сөндіру бекеті бір уақытта екі жерге шығуға есептелген, жеке құрам 100 пайыз
жасақталған.
«Әкімдік қолдауының арқасында жыл соңына дейін 33 техника сатып
алынатын болады, оның 11-і әкелініп қойылды. Мердігер жыл соңына дейін
осы нысанның құрылысын аяқтауды міндетіне алды. Сонымен бірге «Нұр Ақтөбенің» қазандығы тұрған жерде мамандандырылған өрт сөндіру бөлімі салынып жатыр. Өрт сөндіру бөлімінің құрылысы аяқталған соң, бұл бекет гарнизонның барлық техникасына арналған жөндеу базасы болады. Бұл біз үшін өте маңызды», — деді өңір басшысына жобаның жүзеге асырылу барысы жайында баяндаған Қайрат Қасымов.
Кейін Оңдасын Оразалин «Нұр Ақтөбедегі» көп қабатты тұрғын үйлердің құрылыс
барысын қарап шықты.
«Ақтөбе Сәулет» ЖШС бас директоры Арнұр Ахмадиұлы екі тоғызқабатты үйді
пайдалануға беру жұмыстары туралы баяндады.
«Үйлер 72 пәтерлі. Олардың жартысы — екі бөлмелі, қалғаны үш бөлмелі.
Жалпы аумағы 5 мың шаршы метр. Жыл соңына дейін тапсырамыз. Құрылыс материалдарын қаржыландыру мен жеткізуге байланысты проблема жоқ», — деді өңір басшысының сұрақтарына жауап берген А.Ахмадиұлы.
Биыл облыс бойынша барлығы 1,1 млн шаршы метр баспана тұрғызылмақ. Өткен 9 айда 624,8 мың шаршы метр немесе 4 250 пәтер пайдалануға берілді. Қазіргі таңда облыс бойынша 6 несиелі және 11 жалдамалы-коммуналдық көппәтерлі үйлердің құрылысы жалғасуда.
Облыс орталығындағы, соның ішінде қала орталығынан алыс жерлер мен жаңа тұрғын үй алаптарындағы қоғамдық кеңістіктерге ерекше назар аударылады. «Нұр Ақтөбе» тұрғын үй алабының 1-шағын ауданында үлкен гүл бағын салу басталды. Жыл соңына дейін жаяужол плиткалары төселіп, жаяу жүргіншілер жолы, жарық, суару жүйесі, балаларға арналған және спорт алаңдары, күрке және т.б. орнатылады. Келесі жылы коммуналдық қызметтер гүл бағын көгалдандыру жұмыстарымен айналысатын болады.
Облыс әкімі ескі қаладағы аллеяларды қалпына келтіру жұмыстарын да қарап шықты.
«Ахтанов шаршысын» қалпына келтіреміз, бұл — Қобыландин көшесі бойындағы гүл бағы, Шернияз көшесінің бір бөлігі, сосын Алтынсарин көшесінен Жангелдин
ескерткішіне дейінгі жер. Қиыршық тас төсеп, 120 шам орнатамыз, ескі
қоршауларды ауыстырамыз, 54 шағын сәулет формалары мен баспалдақтарды қалпына келтіреміз», — деді «АЭМК Жарық» ЖШС мердігер мекемесі директорының орынбасары Александр Гальцев.
Жұмыстар қазан айының соңына қарай аяқталады деп жоспарланып отыр.
Қызметтік сапар Жаңақоныс тұрғын үй алабындағы Алматы көшесі бойындағы жолдың жөндеу жұмыстарымен танысумен жалғасты. Осы жылы Жаңақоныста Совет көшесінің 2 шақырымын және Алматы көшесінің 2,3 шақырымын жөндеу басталды. Биыл асфальт төсемнің бірінші қабаты төселді. Жұмыстар келер жылы толық аяқталады деп жоспарланып отыр.
Сондай-ақ Тәуелсіздік даңғылы бойындағы «Азаттықтың ақ таңы» кешеніне арналған орынды қарап шықты.
Қызметтік сапар соңында облыс әкімі ауласы бар аумақтардың абаттандырылуымен де танысты. Ол Әбілқайыр хан даңғылы мен Алдияров көшесі бойындағы бірқатар аулаларға барып, тұрғындармен тілдесті.
«Бізге қатты ұнайды. Ауламыздың жаңартылып, балалар алаңының орнатылғаны
қуантады, қазір асфальт төсеп, бордюрлар орналастырып жатыр. Осылай
жалғастыра беріңіздер, сол кезде қалада бәрі жақсы болады», — деді қала
тұрғыны Вячеслав Сухоносов.
Осы жылы облыс орталығында 220 аула жөнделіп, балалар ойнайтын 67 алаң орнатылады, 9 саябақ пен гүл бағы қалпына келтіріледі.
Сапар соңында облыс әкімі қала басшылығына облыс орталығын әрі қарай
абаттандыру мен жүзеге асырылып жатқан жобаларды уақтылы аяқтауға қатысты бірқатар нақты тапсырмалар берді.