Абаттандыру, құрылыс жұмыстарын жүргізу барысымен танысты

«Кеше облыс әкімі Оңдасын Оразалин Шилісай тұрғын алабында 600 орындық мектеп құрылысының барысымен танысты», —  деп хабарлайды облыс әкімінің баспасөз қызметі.

Құрылысы 2018 жылдың сәуір айында басталған ғимаратты қарап шыққан өңір басшысы жұмыстарды биылғы жылдың соңына дейін аяқтауды тапсырды.

Айта кететін жайт, мектептің үшінші қабатында әлеуметтік осал санаттағы балаларға арналған 110 орындық интернат жасақтау туралы шешім қабылданды.

Бұдан кейін облыс әкімі №53 орта мектепте болды. Мектеп бір ауысымда 700 баланы оқытуға арналған. Қазіргі уақытта мұнда 1900 бала білім алуда. Оқыту үш ауысымда жүргізіледі. Мәселе 1 қазанға дейін шешіледі. Аталған  уақытқа дейін мектепке жапсарлас салынған құрылыс жұмыстары аяқталып, мектепке 400 оқушы ауысады және оқыту екі ауысымда жүргізіледі. Облыс әкімі құрылыс жұмыстарын қарай келе, оларды сапалы, тиянақты және белгіленген мерзімде аяқтауды тапсырды.

Әкімнің жұмыс сапары аулаларды абаттандыру жұмыстарының барысымен танысумен жалғасты.

Естеріңізге сала кетейік, биылғы жылы облыс орталығында 220 аула жөнделіп, 67 балалар ойын алаңы орнатылады. Облыс әкімі 8 наурыз,  Ағайынды Жұбановтар, Есет батыр, И.Тургенев атындағы көшелерде бірнеше аулаларды аралады.

Мердігерлік ұйымдардың басшылары жобалардың іске асырылуы туралы есеп берді.

— 8 наурыз көшесінде ұзындығы 500 метрге жуық төрт аула мен аулаларға кіреберіс жол жөнделуде. Жұмыстар жоспар бойынша жүргізілуде, жақын арада аяқтаймыз. Асфальт төсейміз, жиектерді орнатамыз, тастарды төсейміз, тұрақ аймағын жабдықтаймыз. Ұзақ жылдар ішінде алғаш рет аулалары ретке келтіріліп, мүмкіндігінше көмек алғандары үшін тұрғындар  дән риза, — деді «Ремгорстрой» ЖШС мердігерлік ұйымының өкілі Жәнібек Құдайбергенов.

— Бұрын мен сіздің қабылдауыңызда болған едім. Біздің көшені қалпына келтіруге ықпал еткеніңіз үшін рақмет! Бізде зейнеткерлер көп, барлығы теміржолшылар, аулада қарт адамдар жиі сүрінетін. Енді мұндай мәселе болмайды, — деді облыс әкіміне 8 наурыз көшесінің 80 жастағы тұрғыны.

Облыс әкімі осы айдың соңына дейін көшеде жарықтандыру жүргізілетініне, ал келесі жылы үйлердің қас беттерін жөндеу жұмыстары басталатынына уәде берді.

Тургенев көшесіндегі үйлердің тұрғындары да алғыс айтты.

— Бізде қазір кішкентай Арбат бар деп айтуға болады. Балалар емін-еркін ойнайды. Біз абаттандыруды, асфальт төселуін өте ұзақ күттік. Сіздерге алғысымыз шексіз, — деді ПИК төрағасы.

Ағайынды Жұбановтар көшесінде облыс әкімі осы жылдың қазан айында аяқталатын «Жастар» аллеясының жаңартылған құрылысымен танысты.

Айта кетейік, аллея маңындағы екі көп қабатты үйде жастарға арналған көрікті муралдар пайда болады.

Қаланы аралап шыққан облыс әкімі қала басшылығына облыс орталығын одан әрі абаттандыру бойынша бірқатар нақты тапсырмалар берді.